E Teil isch dankbar, and’ri schimpfe:
Uf all Fäll redt me über ds Impfe!
Ganz klar: d Entwicklig vo der Lag
Isch ds grosse Thema, Tag für Tag
Me cha derfür sy, ou dergäge
So langsam darf me aber säge
Dass’s würklech öppis nützt
Dä Impfstoff, wo me sprützt!
Was isch eim also übrig bblibe?
Es paar sy mal zur Wälle 7
Bärnexpo, Wankdorf sy beliebt
Bi däm, wo d Chugle rueig schiebt
Doch nume müedi Eifaltspinsel
Göh hie ir Stadt i ds Zentrum Insel
Di and’re mache gärn
E Reis i Kanton Bärn:
Der Köbu wott sy Chance packe
U nimmt d Termine z Interlake
Der Tom seit, dass’s ihm besser gfiel
Müesst är nid uf das huere Biel
Dert chasch derfür am Morge dastah
Und eifach für dy Dosis aastah
Der Pesche und sy Jeanne
Di fahre uf Tavannes
Der Slot, wo d Ruth het chönne finde
Isch leider i däm Langnou hinde
D Samantha het e bess’re Luun
Wül si het’s neecher für uf Thun
Der Dominik geit mit der Trine
Für einisch halt uf Burdlef yne
Der Urs, nid ideal
Dä mues uf Langethal
Wo immer du bisch häre ggange
Du steisch ir Regel zersch i d Schlange
U chuum bisch dinne, hei si gschwing
En Art Pischtole a di Gring
Chli speeter bisch de ire Zälle –
Dert tuet sech o dys Gmüet erhälle
Wül jitz git’s zu dym Schutz
Der heiss erwartet Sprutz
So hei d Luisa u der Schämpu
Im gälbe Büechli no e Stämpu
Si strahle: «Ändlech sy mer duss
Dank üsem zwöite Pfizer-Schuss!»
D Melinda, d Sophie und o d Erna
Di ghöre stolz zum Team Moderna
Der Arm tuet zwar chli weh
Si juble trotzdäm: «Yeah!»
Drum höret uuf mit spekuliere
U tüet nech hütt no regischtriere!
O we’s halt schwirig isch z verstah
Wi’s louft mit däm m-RNA
Wär’s jitz für alli Zyt z erwache
Und sich das Pyksli ga la z mache
‘S isch würklech evidänt
D Devise vom Momänt:
Syt nümme abstinänt
U impfet konsequänt!
So richtig effiziänt
Wird’s ersch bi 80 Prozänt!
Der Ben Vatter isch nid vom BAG gsponseret, kennt der Herr Koch u d Frou Lévy nid persönlech u het weder Aktie bi Pfizer no bi Moderna. Er isch eifach froh, dass dank dene Impfige das ganze Corona-Theater jitz de gloub würklech langsam düre isch u dass me derfür wider i ds richtige Theater cha.