zur wideruferstandene Fasnacht
Video, ufgnoh am 22.02.2022 i der «Cappella» Bärn:
https://www.youtube.com/watch?v=jBBvyEPKXCI
Teggscht: Ben Vatter, Bilder: „Crazy“ David Levine
Ja, grüessech wohl, mir sy di Nöie
Eigentlech ja o di Alte
Ds erschte Mal sy mir hie live derby
Jitz lähnet zrügg, Dir dörft chli löie
Löt Nech hie la unterhalte
‘S fröit is, syt Der üses Vis-à-vis
Zwe wyssi alti Manne mit schwarzer Farb im Gsicht
Kes *_:inne hanget dranne, derby wär das hütt doch Pflicht
Uf ds Tierwohl chunt’s is o nid so drufaa
Dir chönntet jitz no grad ds Lokal verla
Wül ächt, das isch dermasse mies –
Da bruuchts ganz klar e Warnhiwys
Si wei i däm Ouschtralie der Djokovic nümm ha
Und gwüss nid wäg Lappalie, dä wird nie meh ynegla
Es Visum chan er sich o niene chouffe
Jitz mues er halt de über ds Wasser loufe
Uf Bärndütsch seisch zu som ne Pack
Nid «Heiland» sondern «Heilandsack»
Ja, d USA sy dusse us däm Afghanischtan
D Chinese und o d Russe hälfe gärn de Taliban
Der Weschte aber setzt uf Gottvertroue
Wän kümmeret scho ds Lyde vo paar Froue?
Bi all däm mügleche Entsetze
Muesch halt Prioritäte setze
Es «Rest in Peace» em Bund, er isch quasi fusioniert
U drum isch’s o kes Wunder wird der Titel jitz justiert
Der «Z» chunt hindedra, so git das «BundZ»
Und ja, di Zämelegig isch e Brunz
Da chöi mer mache, was mer wei
‘S wird alls Tamedia-Einheitsbrei
Der Musk, dä syg e Stütze, är wird d Person vom Jahr
Het gschwore, d Mönschheit z schütze und z bewahre vor der Gfahr
U drum syg’s für e Elon Musk e Pflicht:
Für all im All gält’ üb‘rall Maskepflicht
U de? Mir hoffe, dass’s Nech gfalli
Alles and’re wäri gloge
D Stimmig schynt is ämu grandios
Doch halt, mir hei no gar nid alli
Gnüsslech dür e Ggaggo zoge
Drum chunt hie Teil 2, es geit scho los:
D Frou Merkel, di isch wägg und ABBA wider da
Der Kurz isch churz spitz wägg und «Wetten dass» isch wider da
Der Trump isch gottlob wägg – doch gly scho wider da
Der Harry isch chli wägg, der Philip ganz u d Queen no da
Der Nsame isch wägg, u der Aebischer isch wägg,
u der Martins isch o wägg, u der Hefti isch o wägg,
u der Spielmann isch o wägg, u der Bürgy isch o wägg,
u der Fassnacht wider wägg, der Camara isch o wägg,
der Sulejmani jitz no wägg, u der Meischtertitel wägg
Doch der Wagner, dä blybt da
Der Federer isch wägg u glych im Wärbeblock no da
O ds Virus isch mal wägg – u plötzlech wider da
Und leider isch der Schnägg nid wägg u hocket geng no da
Der Endo isch o wägg – u glych geng no chli da
Bir Fasnacht seit me zägg und wägg u trotzdäm isch si da
Ja, alles isch im Wandel ussert d Tories
Di sötte o mal wägg mit ihrem Boris
I ha ja sälber nüüt gäg Party
Doch mängisch hulfti‘s, dass me warti
Der Putin rüschtet uuf u d Wält, di luegt mal zue
Är schiesst Raggete druuf u het mit däm no lang nid gnue
‘S isch wider Chrieg z Europa – eifach chrank
Das git ke Pointe für ne Schnitzelbank
Dä tröimt vo Zyte vo de Zare
U macht druus Zyte vo Barbare
Der Markus Somm, dä het doch der Näbelspalter gchouft
Jitz het er gseit, är wett doch, dass me dä chli anders touft
E nöije Name passt zum nöije Gstalter
Ganz unvernäblet heisst’s jitz «Landesspalter»
So chan er mit em Rima fyre
Dass öppis Rächts wärd us Satire
Sogar der Rocker «Gölä», dä passt hie o no dry
Är schefflet wacker Chöle und wett glych e Büezer sy
Doch öppis chan i eifach nid verstah:
Wi hätt dä nume «no vil blöder ta”?
Wär trotzdäm fingt, di Platte chouff‘ er
Dä chunt vom Räge no i Trouffer
Ja, d Ehe gilt für alli, das hei mer chürzlech glehrt
Me gloubt, dass’s allne gfalli, ‘s syg doch würklech nid verchert
O d SVP fingt, ‘s sygi beschtens grate
Wül ändlech chönn der Fuchs der Hess hürate
Und nöi chöi si bim Sich-Vermähle
O beidi ds Gschlächt no sälber wähle
So, das wär’s o gsy mit Lache
D Tüpflischysser heit der gnosse
Schön, syt Dir hütt alli härecho
U wül mer’s hüür uf Schmalspur mache
Sy mer felsefescht entschlosse:
Ds nächscht Jahr wider richtig – öppe scho!