zur abgseite Fasnacht
Video, ufgnoh am 14. Februar 2021 im Kulturlokal „ONO“:
https://www.youtube.com/watch?v=50UBM2f_4UE&feature=youtu.be
Teggscht: Ben Vatter, Bilder: „Crazy“ David Levine
Ha gwüss grad mit mir sälber müesse ringe:
Ja, darf me überhoupt no öppis singe?
Es «Nei» wär hie der Konsens
Doch d SVP fingt: «Nonsens!
Em Ueli darf me geng es Ständli bringe»
Wül grad bi sich isch ds Parlamänt
gäg ds Konsequänt-Sy resischtänt
Nach vier Jahr isch dä Horror äntlech düre
D Erliechterig, di cha me wältwyt gspüre
E chlyni Angscht blybt doch
‘S syg wi bim Dani Koch
‘S chöm dä Cheib o geng wider nöime füre
Der Koch schlat dadruus Kapital;
em Trump geit’s meh um ds Capitol
D Viola findet’s würklech nid zum Lache
Was söll si mit de Kampfflugzüüg o mache?
Jitz guub’s doch äntlech nöji
Und was se drum so röji:
Si cha nid mal me ds WEF dermit bewache
Vor ganze Wält göh alli Scheffe
jitz halt uf Singapur ga weffe
‘S wär schön, d Konzärne würde sech verpflichte
Im Usland o nach Schwyzer Rächt sech z richte
Doch d Mehrheit vo de Ständ
Di fingt, es läng amänd
We Glencore mit ‘me Bricht echli tüeg brichte
Papyr isch schliesslech geng geduldig
und alli Nase blybe guldig
Entstande wäg de Grieche isch ds Wort «Grexit»
U wältberüemt du worde isch der «Brexit»
Das chönnt me doch o z Bärn
Mir hätte’s sogar gärn –
Wül hie, da plangt me lang scho uf e «Schneggsit»
U plötzlech list me dä Salat:
der Schnägg wärd einisch Bundesrat!
O d Stadt mues spare – ja, das spilt e Roue!
Me mues doch all di Stüürusfäll verdoue
Im Stadtrat gieng’s grad schön
Chli z chürze bi de Löhn
Dert hocke jitz ja guet zwe Drittel Froue
Im Grund gno wär me besser dranne
me sparti bi de Hampelmanne
Am Hirschegrabe git’s gly Lüt i Schaare
U trotzdäm sölle d Outo obe fahre
Für d Mönsche, ‘s isch e Hohn
Blybt d Kanalisation
Der Schysluun, ja, dä chasch der so bewahre
Nenei, eso isch’s ungerächt:
dä Plan isch unterirdisch schlächt!
D Frou Wyss, di tuet im Gmeindrat nümm verchehre
Di meischte chöi se dert o guet entbehre
Jitz chunt d Marieke Kruit
Und was die bsunders fröit:
Mir hei scho ihre Name chönne lehre
Syt Rudi Carell isch’s eso:
das Holland macht eim eifach froh!
I bruuche’s halt – wär sött mir das vergälle?
Di Zahl, wo jede Tag mir hilft z erhälle
Wi d Lag i der Nation isch
Wi krass das d Situation isch
Bim Punktestand vo YB ir Tabälle
Und Gool u Pünkt git’s geng no meh
dank üsem Schämpu Nsame!
Ja okay, mängisch muesch chli warte
we’s widermal heisst: roti Charte!
Doch we si dise halt nid lö
de trifft ja o der Siebatcheu
Chasch stundelang im Winter umeblüttle
Probiere, em ne Tschugger eis ga z chnüttle
Chasch schyle uf der Stäge
Isch das nid gnue verwäge?
De gang em Marco Rima d Hand ga schüttle
Dert git’s, als gröschti Attraktion
di nöischti Virus-Mutation!
I weis, me cha sech furchtbar echauffiere
Ab settige, wo ds Virus ignoriere
Eh, löt se doch la schimpfe
Gäg d Maske und gäg ds Impfe
Di tüe sech de scho sälber dezimiere
Me weis, dank Darwins Theorie
dass d Mönschheit schlöier wird derby
Und nach däm Jahr, voll Chummer und Beschwärde
Cha ds Einezwänzgi nume besser wärde:
Äntlech wider lache, Züüg abmache
Ds Grosi bsueche, Ferie bueche
Musiziere, ga souniere
Zäme shoppe ohni z stoppe
Wider wandere mit andere
Ga jasse, nüüt verpasse
Züüg erläbe, Händli häbe
Zäme singe, zäme schwinge
Wider ds Niesse chönne gniesse
Voll Entzücke öpper drücke
Fröhlech dastah o bim aastah
Zäme znächtle und fasnächtle
Wider flörte wi di Gstörte
Umeschwanze und ga tanze
Mit de Beschte zäme feschte
Zäme löle, zäme gröle
Mit de Clique, wo glych tygge
Umehange uf ne Stange
Und es Weize i de Beize –
All die Sache wider mache;
I weis, das wird der Himel hie uf Ärde