Video, ufgnoh am 10.02.2023 bi der Nydeggchilche z Bärn:
https://www.youtube.com/watch?v=qT9-XHpz9ks
Teggscht: Ben Vatter, Bilder: „Crazy“ David Levine
Ja, grüessech wohl, da sy mer wider
’S isch es ganzes Jahr vergange
Syt mer ds letschte Mal bi Öich sy gsy
Zu üser grosse Fröid isch sider
d Fasnacht wider uferstange
Schön, syt Dir o dasmal mit derby!
D Elisabeth Baume-Schneider und Ölbert het me gno
Für Basel heisst das: leider nein, für Züri – schad! – grad o
Me het halt jitz di Liebe lieber z Bärn gha
E Vogt, e Herzog het me no nie gärn gha
Und statt bim Evi Allemann
Heisst‘s gly bim Jositsch: Allez Mann!
Drum tuet me diskutiere, öb ds Land jitz d Stadt regiert
Wül d Bure dominiere wärdi d Stedt diskriminiert
Da mache‘s d Wähler_*inne vor Gmeid Chüniz schlauer
Di näh e linggi Frou – und die heisst Bauer
Obwohl, das han i mit’bercho:
Nid alli sy da Fän dervo
Es glingt de Mediziner e Rise-Sensation:
Di schaffe geng wi fyner bi der Härztransplantation
Es Mönschehärz chunt use, ds Souhärz dry
I gloub, dä Ygriff isch bim Putin gsy
Nei, wäger nid, das wär ja vou
Beleidigend für jedi Sou
Es isch üs allne klar: Bim Strom u’m Gas längt’s nid
Me gseht im nöie Jahr drum jitz e klare Unterschid:
We d Lüt toll heize, we si Beder näme
De tüe si sech am Schluss no ganz fescht schäme
Wül bim persönleche Verzicht
Zeigt jede halt sys wahre Gsicht
Klopf, klopf, klopf, es ist Zeit
Für Scherze und Spass, gemeinsam bereit
Mit Lachen und Freude, den Tag erhellen wir
Kommt und seht, wie wir zusammen lachen, ohne Zögern hier
Dir findet, das syg jitz chli komisch gsy?
Eh ja, dä Teggscht isch vom Chat GPT
Da sy mer ersch beschränkt entsetzt
Und wärde no nid grad ersetzt
Der Gianni vo der FIFA isch Chef vor Korruption
Doch statt me dä würd yfa, git me ihm es Mikrophon
Är füel sech hütt, seit dise, behinderet und schwul
Und het eso bewise: I sym Gring isch öppis fuul
Di One-Love-Captain-Binde, wo steit für Mönscherächt
Di löi me la verschwinde, wül di pass dert eifach schlächt
Der Stadionbou hingäge, dä sygi ideal
Me chönn o würklech säge ’s syg für ds Klima alls neutral
Und toti Büezer? Sicher nid paar Tuusig!
Es isch eso: Katarrh isch eifach gruusig
U de? Mir hoffe, dass’s Nech gfalli
Alles and’re wäri gloge
D Stimmig schynt is ämel grandios
Doch halt, mir hei no gar nid alli
Gnüsslech dür e Ggaggo zoge
Drum chunt hie Teil 2, es geit scho los:
D Elisabeth isch wägg – doch d Monarchie no da
Der Harry total wägg, wül däm sys Büechli isch jitz da
Der Boris: ändlech wägg – und (hä?) d Liz Truss isch da…
…isch wägg, der Rishi Sunak da
Doch rymt sech o Sunägg uf „wägg“; wi lang isch dä äch da?
D Jacinda isch o wägg – der Macron blybt no da
Der Bolsonaro wägg, der Lula ds dritte Mal scho da
O d Gletscher sy gly wägg – der Klimawandel da
Ds Mitholz sy d Lüt mal wägg, wül d Munition isch geng no da
Der Federer isch wägg – es Tränemeer blybt da
O Föözen nimmt sech wägg, doch yeah: der Odermatt isch da!
’S git vil, wo sötte gah – und eine per Se
Lä lä lä lä lä lä lä lä lä lä lä…
Wül ehrlech, nach der nächschte Lugi
Geit‘s ab uf Frankrych mit em Flugi
Vor BLS di Schiff, di wärde nid verchouft
Me heigi alls im Griff, heisst’s dert, es Nöis wärd gly scho touft
Der Kanton Bärn git ds Gält, wo si nid hei
Abschiffe chöi die würklech guet elei
Wül B-L-S – so wi die weisse –
Chönnt «Bringet lieber Stüüre!» heisse
‘S isch fei es Zytli här, der Film vom Dokter No
U glych weis jede, wär dass dert zum Meer isch usecho
‘S isch ds Ursi Andress, mit de schöne Rundige
Doch süsch chunt weni Schöns vo Oschtermundige
Der Stapi wott’s glych dürestiere
Und um z Verrecke fusioniere
Ja, d SNB macht hüür Verluscht, es isch nid schön
Das chunt üs zimlech tüür, grad wäg em Loch bi den Kantön
’S nützt nüüt, sech nach de Millione z sehne
Me chönnt – wi d Stadt – bim Gianni paar etlehne
Em Aebersold isch das egal
Es göng um d Zinse, nid d Moral
E Band, won i chli kenne, di hei gly es Konzärt
Da fröie si sech henne, wül so stygt de ihre Wärt
Es isch ir Brass – u drum wei si sech äbe
Churz vor em Uftritt dert uf d Büni chläbe
‘S müesst nume eim chli unwohl sy
De wär der Gig süsch scho verby
I üser’ schnälle Zyt, da fingt me chuum me Rue
Jitz sy mer scho sowyt: Ds normale Tempo isch nümm gnue
Hütt lost me uf sym Händy mit Doppel-Gschwindigkeit
Was wider e eländi Lyritante druuf het seit
Bir Musig und bi Filme, o da heisst’s: «Jitz mal Hü!»
U scho wird gspeedet, wil me het ja Tempo Faktor 3
So geit si immer wyter, die Gschwindigkeite-Gier
Und ohni’s z merke syt Der uf Beschlöinigung mal 4
……….üüf…….…..füüf
Eso sy durchuus paar Minute z gwinne
Me fat derfür o ganz schnäll afa spinne
So, jitz isch o fertig mit de
Stänkerer u Wadebysser
Mir sy wider nätter – vorderhand
‘S fröit is, syt der cho zur dritte
Usgab vo de Tüpflischysser
Schöne Aabe – Adiö mitenand
Live-Uftritt am Fasnachtsdonnschtig 2023 im Bärehöfli („BUND“ online):
https://www.derbund.ch/die-schnitzelbank-soiree-im-video-584249274916